Ыам ыйын 2 күнүгэр «Күннээйик» үҥкүү ансаамбыла тэриллибитэ 10 сыллаах үбүлүөйдээх киэһэтигэр анаммыт «Күн сылааһын уунабыт» диэн кэнсиэрэ үрдүк таһымҥа ыытылынна.

Бииртэн биир саҥа үҥкүү сыанаҕа тахсан истэ. Таҥастара мааныта, бэйэлэрэ эчи кэрэлэрэ, имигэстик хамсанан, үҥкүү кэрэ абылаҥар куустаран, көтөн-дайан, бу күн үрдүкү сыанаҕа чахчы да көрөөччүлэри сөхтөрдүлэр, сүргэлэрин көтөхтүлэр. Хас биирдии нүөмэри биир тыынынан көрдүбүт!

Үҥкүү киэһээтин бэйэлэрин эҕэрдэлэрин ырыанан, үҥкүүнэн киэргэттилэр «Ситии» үҥкүү бөлөҕө, Хорообут орто оскуолатын үөрэнээччилэрэ. «Күннээйик» үҥкүү ансаамбылын тэрилтэ салайааччылара кэлэн эҕэрдэлээтилэр, махталларын анаатылар, өссө да үҥкүүлэринэн кэрэхсэтэ туралларыгар баҕа санааларын тириэртилэр.

10 сыл иһигэр “Күннээйик” үҥкүү ансаамбыла үгүс ситиһиилэнэн, айар үлэ умсулҕаныгар уйдаран, тулалыыр эйгэлэрин сырдыгынан угуттуу туралларыгар баҕарабыт. Бэйэ-бэйэни өйдөһөн, өйөһөн, түмсүүлээх кэлэктиип быһыытынан үүнүҥ-сайдыҥ. Салайааччыларыгар Нюрбина Михайловнаҕа айымньылаах үлэни, үрдүк ситиһиилэри баҕарабыт.