Хорообут нэһилиэгин баһылыга Гаврил Бродников салайааччылаах Хорообут дьоно-сэргэтэ Хотун Төҥүлүгэ үгэс буолбут 69-с култуура уонна успуорт эстэпиэтэтин түмүктүү айаннаан кэллилэр. Успуорка күрэхтэһиигэ 19,5/15,5 очукуоланан Төҥүлүлэр кыайыы өрөгөйүн биллилэр. Хорообуттар уус-уран кэнсиэрдэрэ инники сыллартан лаппа тупсубутун бэлиэтээтибит. Элбэх ыччат саастаах дьон кэнсиэри киэргэттилэр. Саҥа талааннаах ыччаттар эстэпиэтэни илиилэригэр ылан эрэллэрэ кэрэхсэбиллээх. Ити курдук быйылгы эстэпиэтэни түмүктүүр хорообуттар кэнсиэрдэрэ үрдүк таһымнаахтык ааста.

Лауреаттарынан буоллулар: хор – И.Лебедев тыл., Ф.Гоголев дьүр., “Эйэ иһин” – хормейстер Георгий Попов, баяҥҥа доҕуһуол Федор Сергучев, сцена бэтэрээнэ, Алампа суруйуутугар “Төрөөбүт дойду” хоһоону доргуччу аахпыт 93 саастаах Александр Андреев,  кырыымпаһыттар бөлөхтөрө “Уһуктуу”, фольклорнай коллаборация “Сайыны уруйдаан” (сал.Александра Пинигина, Арсений Андреев, Линда Захарова), “Эрэл” үҥкүүһүттэр бөлөхтөрө — “Дьөһөгөй оҕолоро” – («Дэйбиирдээх үҥкүү”), “Хотугу үҥкүү” – сал. Нюрбина Брызгалова, Уруйдаана Сергучева, сценка “Биир күн” – сал. Анастасия Баишева; И.Федосеев тылл., В.Андросов дьүр. “Туундара” — Иннокентий Тастыгин, Е.Неустроев дьүр. “Кыыс оҕо” – Петр Сергучев; Нохтохоон тылл., Инна Донская дьүр. “Дьылҕа суола” – Анастасия Протопопова сольнай ырыалара, олохтоох ааптар Петр Сергучев тылл.уонна дьүр. “Күөрэгэй” — Петр, Степан, Федор, Ньургун Сергучевтар квартеттара, Арсений Андреев Алтай норуотун ырыата “Ойно”  домбраҕа оонньооһуна, “Үргэл” дьахталлар ансаамбыллара (сал. Линда Захарова, Федор Сергучев), “Кытыл” ВИА — солистар Николай Герасимов, Петр Сергучев, эдьиийдии балыс Линда Захарова, Анастасия Протопопова дуэттара – ааптар дьүр. “Эдэр ыччакка”.